唔知大家覺唔覺，香港人真係超級無敵tough。工作要tough、係屋企要tough，甚至對住朋友、另一半都一樣咁硬淨，甚麼脆弱呀軟弱呀傷心難過呀，呢啲情緒簡直唔應該係人生存在添呀。有時情緒低落一排或者喊多幾次，甚至會覺得自己「唔正常」。

喂咪住先，情緒低落有幾唔正常呢其實？

今次Healing Story係一個糾結咗好耐的朋友。而當中最大既糾結係佢覺得自己有太多負面情緒，每隔幾晚就會好想喊，當佢忍住既時候，心入面會有把聲音迫佢發洩，佢覺得咁樣好奇怪，擔心自己係咪有咩事。

我地開始做療癒個陣已經見佢不斷流眼淚，到做完既時候，佢係控制唔到自己崩潰式地喊左半個鐘。喊完之後佢同我講對唔住，問我佢係咪好奇怪，我當然即刻話唔係啦（因為係呢度喊真係好正常既事lol），同埋佢呢個問題就令我發現：原來係佢心入面覺得有負面情緒已經好奇怪。

再同佢傾深入啲，原來因為原生家庭既關係，佢由頭到大都好獨立、好堅強，甚至稱得上係一個人支撐住成個屋企。係呢個情況下，佢自然覺得自己唔可以軟弱：係公司唔可以弱，係屋企唔可以軟，因為咁樣等於曝露自己的弱點比人知，亦都會令到身邊既人唔能夠依賴佢。當然，習慣性想人依賴係另一樣需要處理既問題，但情緒釋放係佢當下最關鍵要處理既課題。



人的情緒分好多種，快樂、驚恐、憤怒、悲傷、厭惡等等，呢啲都係人與生俱來會擁有的情緒。先唔好講情緒係點樣黎，但係人有情緒絕對係正常不過的事。


當有情緒既時候：「接受 → 理解 → 釋放」，情緒就會走。


好似開心既時候我地會笑 ── 開心係一種情緒。我地接受自己快樂，理解自己快樂的原因，然後做出相關行為「笑」去處理。笑完、釋放左，呢種情緒就會離開。我地可以接受自己處於快樂的情緒中，點解唔接受自己會有難過既時候？
當難過既時候，承認自己情緒低落，理解低落的原因，然後做出相關行為，例如喊、向人傾訴、做運動等等，釋放後，呢個情緒都會自然而然地走。
如果佢唔走，即係未處理同釋放夠，重複以上步驟is okay。

而當我地唔肯承認、唔處理同面對情緒，情緒唔會自己消失，佢只係暫時隱藏。到同類型既事再次發生，情緒又再次牽動既時候，所帶來的反應就會更加強。

想像人的情緒就好似一條河流，由於有暴雨、風暴等原因，偶爾有洪水係好自然既事，只要正常地疏導，好快就會冇事，河水都會繼續流動；但如果你格硬要起個堤壩塞住佢呢，唔少歷史都反映左，總有一日會決堤。

都市人大家都明白香港人好怕自己軟弱，每個人都會。但係相信每個人既身邊都有值得信賴的人，可以比你訴衷情；就算冇既，你都可以選擇用唔同既方式自己處理，例如行山、食野、做運動，總有一個你喜歡而又處理到情緒既方式。


與其要積到臨界點然後喊到天崩地裂，不如有情緒的時候，就乖乖地正視同面對啦。
祝福大家都可以直面自己軟弱的一面，哭過了再站起來面對。

 

Jeanie

2021