前陣子有位客人覺得感情運欠佳，多年身邊完全0桃花，甚至搵人做儀式同調頻都冇用，如是者佢認為自己可能係有課題要處理，就來預約做療癒。

諮詢期間發現客人已經單身了五、六年，明明心入面好想拍拖，但真係遇唔到對象。唔好講比人呃，男仔都識唔到個呀。我好奇一問：有冇download交友app識下人呀？


佢答：都冇用架，點會識到人啫。


聰明嘅長期讀者應該發現到問題出自邊度 ── 當心入面同潛意識都覺得唔Work，宇宙自然會顯化你潛意識所想，亦自然識唔到合適的對象，因為你覺得冇用嘛。

聽到呢度，我就再問多幾句：你有冇諗過下一個對象係點識架？係點樣嘅性格呀？同你段關係會怎麼樣呢？
 

佢又答：諗黎都冇用啦，唔通我諗吳彥祖從天而降佢就真係會從天而降咩。

其實佢講得啱架，你幻想吳彥祖從天而降並唔會實現，因為實際上實行唔到。但當你做另一個極端，咩都唔諗，又唔主動去識人，淨係俾錢做兩下儀式，就期望男朋友突然出現，唔知點解互相認識，又唔知點解一齊左，其實同FF吳彥祖從天而降完全冇分別。


（換成搵工可能會更容易理解，你想轉工，又唔主動去搵工，又唔諗份工會點出現，亦都唔思量自己想要／需要份咩工，你唔係諗住一份絕世好工會嘭一聲出現下話）

所以要搵對象也好、搵工也好、想達成目標也好，做儀式有冇用？做得啱一定有用，但前提係你要落到正確的intention，最起碼都要在腦袋中規劃下啦。即使是用魔法產品，我的使用指南入面都會寫你要諗下想件事點發生，先可以正確地向宇宙落到order。


用返搵男朋友做例子，最少要諗下你期望對方係點既人，以及同你既相處方式係點，宇宙先能夠正確地匹配到一個合適的對象比你。千祈唔好咩都覺得唔得架喇、冇可能架喇、唔會成功架，到真係唔得嘅時候又奇怪明明我已經好努力，點解都係一點桃花都沒有。因為呢個結果都係自己顯化出黎架～


冇目標，冇方向，冇行動，否定一切，你會成功先係奇跡。

當然呢啲故事都係Happy Ending既，幫呢位朋友清理左固有的消極想法，做左幾次唔同的清理同調整，雖然而家未正式拍到拖，而最少，佢已經成功識到幾個人，慢慢摸索緊自己最需要同想要既戀愛，相信拍到拖都係早晚既事。

呢個故事想帶出嘅係，人生在世做任何野的前提係，你既intention一定要清晰明確，而且要相信自己既intention會實現，正面期待佢來臨，咁先會事半功倍。


祝福大家可以目標明確，一撃即中。

 

Jeanie

2021